قميص الحرية .. قصيدة للشاعر محمد رؤوف

0 تعليق 37 ارسل طباعة تبليغ

   انا عارف
    هتجيبها جمايل
    ففضلت اتحايل
    واستنى الفرصه فـ مواعيدها
    ماناعارف
    هترد مظالمى اللى واخدها
    مديتلك ايدى كتير
    ومازلت ماددها
     وبقولك هات
     لاخضر كاروهات 
    وشوارع روحى بنفس اللون 
    والهوى مجنون
    وحبيبتى حوريه
    ولياقتى قميص الحريه
    والثوره حاجات
    وحاجات 
    وحياة الخلق اللى بترفض عيشة الاموات
    وياك انا رايح 
    ودينى
    انما فى الآخر تدينى
    إفراج على أبيض صفحاتك
    واعفينى من احمر جراحاتك
    أمانيّا تقابل نفحاتك 
    وربيعك صوف
    فى الشتا موصوف انه يدفى عضم الاوطان
    وطموحى الخيش
    تلبسه احلامى العريانه وان شا الله تعيش
    وادينى الاسود بفته رخيص
    كفن الحكام الأباليس

    عبيلى فـ كيس الوان مشتقه
    بقماش صينى
    واقرالى " الحاقه " ووصينى 
    اعملها اتواب
    لقلوب الناس البرانى
    علمنى حساب الحب فـ عصر الشرانى
    علمنى ان الهدمه صفات
    ومبادئ
    واثبتلى ان الظالم أظلم
    حتى اذا كان مش هوه البادئ
    واسقينى بطوله
    علمنى الأسماء الأولى 
    واحد
    اتنين
    الشجره الملعونه شمال
    والفرحه يمين
     والعوره اذا ظلت مفضوحه ومكسوره العين
    علمنى ازاى استر نفسى
     من غير ماأسب لروحى الدين
    وعن الأفكار المغلوطه 
    هدلى قواعدها
    علم .. اثبت .. إنهى
    خطايايا السابقه اللى بعيدها 
    طهرنى بتعاليمك منها
    واوجدلى النظريه الأفضل كالعاده
    لبسنى مألم بالطول
    او ساده
    مش فارقه معايا ان الارصفه
 جوه الميادين تبقى وساده
    شجرلى الافراح جوايا
    تطرح ثمرات الخير أمنحها لغيرى
    افرد فى دواخلى نجيل الجيل المتمرد
 ع الأسر براح
    فقطلى الاحزان الميرى 
    وادينى سلاح  زى الكلمه
    من غير لا ماسوره 
    ولا دبشك  
    انما بنيشان مايفلّتشى
    الكلمه سلاح عند المايله
    يعدلها انما مايموتشى
    ارسملى فـ عز الشده رفيق
    وارسملى بلون الجنه طريق
    وارسمنى شهيد بيعديلها
    من على نيلها
    ومداين الدم استبدلها
    بجناين ورد

Sponsored Links

 

 

0 تعليق