أشياء مشابهه ... قصيده للشاعر: سيد منير عطيه

0 تعليق 113 ارسل طباعة تبليغ

كل شئ ممكن يكونلك
ف الحياه أشياء مشابهه
حتى ف الأحداث بالاقي
برضه فيه أحداث مشابهه
زي حرب ف قلب جبهه
كل شئ يشبه لكلُّه
صوت قنابل
صوت بارود
صوت رصاص
واللي راحوا للخلاص
دمّهم على كل جبهه
إلا إنتي
شئ مالوش أبدا شبيه
والغريبه إن حبّك
م الجحيم واخد طباعه
واللي أغرب من دا كله
قلبي سابني وراح عليه
رغم قلبي ملاك بطبعه
يبقى نارك تاخده ليه ؟!
شئ طبيعي يكون سؤالي
جوّه نارك حس إيه ؟
المؤكد حاجة أجمل
من حياته وم الكلام
المؤكد جوّه نارك
جنّه وعليها السلام
وان قلبي ف حضن قلبك
إنطلق بجناح حمام
واللا يمكن حاجة تانيه
حاجه أكبر
حاجه خلّت قلبي يسكر
وامّا غاب عن وعيُه راحلك
كل حاجه ف إيده سابها
ساب حياته اللي ف زينتها
ساب راحتها
ساب تعبها
لما شافك شئ مالوش
ف الحياه أشياء مشابهه
بس خوفي يفوق ويلقى
نفسه شجره ربيعها عدّى
والخريف لحظة ما هدّى
مد إيده قوام وجابها


سيد منيرعطيه
من ديوان( باستغربك)

Sponsored Links

0 تعليق