فضفضة رضوى ابراهيم - "لو كنت رئيس "

0 تعليق 575 ارسل طباعة تبليغ

في لحظة تفكير مع نفسي سرحت في التفكير...إيه اللي هيحصل لو كنت رئيس ؟!

لكن رئيس في أي مرحلة قبل ثورة يناير ولا بعدها؟ هتفرق يعني؟!

Sponsored Links

طبعا هتفرق كتير ! لو هتبقي رئيس قبل الثورة إلتزاماتك هتكون أبسط من بعد الثورة يادوبك هتهتمي بالأمن والتعليم ودومتم ... الناس راضية بأي حاجة ...

لكن بقى بعد الثورة حاجة تانية  .. حاجة تانية إزاي؟!  هههه حاجة تانية خالص ... هقولك .. هتواجهي بلد متقسمة كذا قسم ... إرهابين ..، أنصار شخص معين ... ثورجية ...بلطجية ... ناس عايزة تعيش ...وقلة مفكرين بتحب البلد بجد ...

لكن قبل ما أكملك عايزة أقولك حاجة .. تخيلي معايا ناس محبوسة في قمقم ... متعرفش المعنى الحقيقي والصحيح :

للحريه

للعداله

للحق

للالتزام

للدين والتدين

للرحمه

لسماع الأخر وإحترام رأيه

للشغل

لكلمة خليك في نفسك

لحب الوطن

وتيجي تقولهم هييييييي خلاص هنفتح القمقم وأنتم من الأحرار ... تفتكري هيعملوا إيه؟  

ها ... ممم .. هقولك أنا في اللي مش هيعرف يعمل حاجة ... وفي اللي هيفتح صدره ويقولك أنا جدع وهو مش فاهم حاجة وفي اللي هيقول المفروض ولازم وهو قاعد لكن هتكون خراب البلد ... ودي أكبر قاعدة هتقبليها لو كنتي رئيس ...

نخش علي اللي بعده الارهابين ... أنا مليش دعوه هما حلوين ولا وحشين لكن إرجعي بالتاريخ لورا ... ناس أغلبهم كانوا في السجون سنين وسنين ... مش موضوعنا بقى كانوا مظلومين ولا ظالمين خلينا في الأهم ناس في سجن وتعذيب لحد ما قلبهم جمد وبقى قلبهم مليان غضب ... سلاحهم الرئيسي القتل والتفجير وإستغلال كلام ربنا بالغلط ودول حاليا معاهم التمويل والعقول المتعلمة وليهم هدف واحد ... هدم وطنا وبناء وطنهم... أدي نوع تاني هتقابله ...

النوع اللي بعده أنصار شخص معين ودول بقى لاغين فكره الإنتماء لوطن وهي فكره واحده اللي مسيطرة عليهم هي الانتماء لشخص ... النوع اللي بعده الثورجية ودول بقى أي حاجه تحصل في البلد ... مظاهرات ... يسقط يسقط ... هما دول معظمهم كويسين لكن في ناس تانية بتستغل حماسهم ده ... ما علينا...

النوع اللي بعده البلطجية ودول بقى عبدة القرش ... البرادس دي أبوهم وأخوهم واللي خلفوهم مش مهم البلد ولا خرابها أنا ودماغي وسلامات يابلد .. والناس اللي عايزه تعيش مش محتاجه شرح عايزين لقمتهم و أربع حيطان يستروهم

أما القلة المفكرة اللي بتحب بلدها دول ياإما بيزهقوا ويمشوا أو لسة بينفخوا في أربة مخرومة بعيد عن السامعين المهم نرجع بقى لموضوع القمقم وكدا لان هو دا أساس البلاوي هو سبب كل الأنواع اللي فوق عايز تخرب وطن إجعل شعبه جاهل وده اللي حصل

لما الجهل عم ..التمرد ظهر

لما الجهل عم .. قلة الحيلة واليأس إتملكوا

لما الجهل عم ..الجنس بقى مسيطر

لما الجهل عم .. جاب معاه فقر العقول وفقر الجيوب

طيب جميل يبقى لو بقيت رئيس هحسن التعليم ... تفتكر هتتحل يعني لوحدك؟! لأ أكيد في ناس زيى كتير جميل لكن هتلاقي الأكتر إزاي... هقولك تيجي تحسني التعليم والمناهج ومتخيله إنك عملتي اللي عليكي هتلاقي مدرس طموح ماديا عايز يدي دروس يقوم يستقصد الطلبة فياخدوا عنده الدروس فالطالب يحس إنه إشترى المدرس بفلوسه ... المدرس يبقى مضطر يدي الطالب علامة يعملها في ورقة الإجابة علشان ينجح اللي أخد عنده درس بالتالي التعليم بقى مجرد شهادة وبس و عقول فاضية مخيفة

هتيجي تقولي الصح صح والغلط غلط والقانون هتلاقي ناس تقولك ماهو في روح القانون هو القانون كتاب منزل يعنى

دا غير .. دا صحبي لازم أكرمه ... قانون مين علي واحد معرفه... رخصه اتسحبت يجبها له... واحد صحبه واقف في الدور يمشيه بالحب ... هتحطي صناديق زبالة علشان الناس ترمي فيها والبلد تنضف ... هتلاقي ألف واحد ظريف لطيف يقولك هو أنا لسة هروح للصندق أنا هرمي وبتاع الزبالة يلم رغم إنه معروف إسمه عامل نظافة مش بتاع الزبالة... إزاي يعني؟!

بصي بلدنا ماشية بالحب ومين اللي ممشيها؟! إحنا ... زمبقولك كده إحنا اللي ممشينها كدا لا أيد خفيه ولا طرف تالت ... أثبتلك... الناس اللي ماتت في مركب رشيد ... طلعت الناس علي الفيسبوك ... أه يابلد ملكيش كبير ... إحنا بقينا العن من سوريا والعراق... هتقوليلي ماهو الفقر اللي خلى شباب زي الورد يطفش ويموت وبدل ما يسافر هجرة غير شرعية ... إنتحر إنتحار شرعي...أنا عارفة إنك مافهمتيش سؤالي ... سؤالي هنا مين المسئول هنعاقب مين؟! الحكومه؟ ولا اللي باع الوهم للشباب دول و أخد منهم فلوسهم ؟ ولا الشباب اللي مات اللى مجربش يحاول فى بلده بالفلوس اللى كان هيسافر بيها ؟ ولا أهلهم اللي ربوا فيهم اليأس وقلة الحيله؟ ولا اللي مسكوا البلد قبل كدا و نشروا فيها الفساد سواء في تعليم أو حتي اللقمه ؟

سودتي الدنيا في وشي خلاص؟! مش سواد لكن حبيت أعرفك أن البلد هي أرض فيها ناس اللي هما إحنا واللي بنزرعه بنحصده ... عايزه ايه من شعب إتربى على أنه محسود والعين صابته ورب العرش نجاه أن أهم حاجه إن فلوس السجاير معاه - غش هتنجح متتعبش نفسك وتذاكر - علشان تبقى بلغت تسبيلتك معاك و دبدوبك في ايدك لكن انك تسعى و تبقى راجل محترم لأ .. المهم الحب الحب - الشوق الشوق - شعب مفطوم على الرومانسية الكدابة اتربى على العيب مش الحرام أن النصب فهلوه

إنتي عارفه إحنا أكتر شعب بنحلف بالله ... بالكذب ... إحنا أكتر شعب بيضحك من الغلب اللي يضحكك أكتر أن غلبنا دا بايدينا والحل؟! تيجي قنبله تهد المعبد ويطلع جيل نربيه من أول وجديد علي الصح وانه يبقى فاضل عايش في المدينة الفاضلة

لأ طبعا دا مش حل ... الحل أن كل واحد فينا يبقى رئيس ورقيب نفسه ... نوعي بقلب مش شغل إعلام وبروباجاندا وخلاص ... إنزل لأرض الواقع وكل واحد يبني باللي يقدر عليه ...سواء بفلوس ...بعلم ... بثقافه نفسيه وتطوير الذات ...بالفن ...بالتوعية الدينية السليمة والصحيحة... إحنا إتخلقنا علشان نعيش مش علشان تيجي قنبلة تلغينا من الحياة ويجي جيل جديد يعيش صح...

أنا لو رئيس هضيف وزاره إسمها وزارة بداية نجاح هلم فيها الشباب في كافة المجالات بدل لما البنات تعمل خدمة عامة ومعارفهم يمضوا ليهم وهما قاعدين في بيتهم يأكلوا ويتخنوا هنزلهم أرض الواقع يعلموا وكل واحد في تخصصه ونفس الوضع للشباب بدل ما ياخد اعفى هوظفه لخدمة بلده طول فترة الخدمة الدكتور يعالج مجانا والمهندس يبني بلده في خدمة وطنه والمدرس يمحوا الأمية واللي عنده مشروع تنموي ينفذه وهلغي كلمة ايه دا هو أنا هعمل لله وللوطن ... أيوه هتعمل لله وللوطن طول فترة خدمتك علشان تبني وطن يحميك و يحمى ولادك .. وبعدها يديك مقابلك ... خليك بني ادام من جواك الأول ...

0 تعليق