قصيدة .. ألف لعنه .. للشاعر: سيد منير عطية

0 تعليق 66 ارسل طباعة تبليغ

لو ما كنتيش سامعه قلبي

يبقى أسف

Sponsored Links

مش ح ابيع الورد إلا

للي تفهم ف الزهور

مش ح اسيب القلب ينده

مش ح اسيب الروح تدور

مش ح اسيب الحبر ينزف

دم نبضي على السطور

يكتبك أجمل قصايد

وانتي تبقي كافره بيهم

مش ح اسيب دواويني تبقى

لعبتك تتسلّي بيهم

ح احذفك من كل شطره

قبل إنتي ما تحذفيهم

أو بغدرك تحدفيهم

جوّه نار بير الخيانه

مش رح اقبل بالمهانه

مهما كانت روحي فيكي

مش رح اخسر نفسي لحظه

مش ح ابيعها واشتريكي

دم قلبي اللي ف إيديكي

رح يصب عليكي لعنه

لأ دا يمكن ألف لعنه

رح تصيبك من دعايا

والنحيب اللي ف غنايا

رح يكون كما نار جهنم

عن شمالك

عن يمينك

والحمم ح تكون ف عينك

مش ح تنشف ليل نهار

رح تدوقي الإحتضار

ألف مرّه ف كل ساعه

قلبي عمره ما كان بضاعه

لجل ع الرف تشيليه

وامّا عينك مِنُّه تزهق

تجري بالرخص تبيعيه

دا ان ما كنتيش سامعه قلبي

يبقى لزمة قلبك ايه

روحي بيعي قلبك انتي

أمّا قلبي ..

مش ح يخرج منّي إلا ..

للي ح تحافظ عليه

سيد منيرعطيه

من ديوان (باستغربك)

0 تعليق