زحمة الأشواق .. للشاعر: سيد منير عطية .. من ديوان سكران حب

0 تعليق 122 ارسل طباعة تبليغ
فردت الشوق على المسافات
لقيته كفاها وزياده
م انا القلب اللي عاشق موت
وواصل عشقي لعباده
ياريت يا حبيبتي بزياده
تسيبي القلب ف الوِحده
وف الأحزان
دنا وانتي بروح واحده
بقالنا زمان
بلاش نصبح بدون عنوان
ونتعذّب بأوجاعنا
مدام الحُب جوّانا
ح نشبع حتى لو جوعنا
بلاش وقت العطش نروي
زهور الحُب بدموعنا
تعالي نزغزغ الأيام
نشد البسمه من ليلها
ولو شوفنا النجوم بتنام
تعالي بشوق نغنّيلها
أكيد من صوتنا هتصحصح
عيونها الحلوّه هتفتّح
وتحدف نور
تعالي بكل شوقنا ندور
على الميادين
نبيع الفُل للعاشقين
ونرسم ع السحاب قلبين
ما بينهم سهم
تعالي نلف جوّه الحلم
وندخل زحمة الأشواق
حبيبتي ضحكتك ترياق
بلاش لحظه تخبّيها

دنا الجنّه بمعانيها
وانا الدنيا اللي ليكي تكون
وملكك كل مافيها
وطول ما الحُب غنوايه
تعالي حبيبتي غنّيها
وانا لحظة ما تنهيها
ح اقول ياحبيبتي عيدي كمان
م انا الجمهور

Sponsored Links

0 تعليق