الارشيف / ثقافة وأدب / ابداع

سكاكين وكفوف.. قصيدة لحمدي حسين

سكاكين وكفوف..
...............................
يوسف كان أجمل خلق الله 
واذا كان يوسف هم .. وهمت بيه
زى ما قالت هى
أبقى انا معزور ..لو اغوط جوه شباك اللا
دى بنات اليوم ..الله .. الله
وشباب اليوم مساكين
سكاكين وكفوف 
وبتنهش ف القد الملفوف
ع الشاشه
وف الشارع
وف صدر الليل
إنى استكفيت من غض الشوف
إنى استكفيت
افتح شبابيكك ع البحرى
اتهوى يومين
طول عمرك كاتم على نفسى
ومكتف مروحتى ف صدرى
قمر 14 جه بدرى
قمر 14 غاب بدرى
ومواعظك نشفت ميتها 
وساحت بودرتها ف قدرى
حقاش تتماطل وتبنج
فى خطاوى اليد الممدوده
مش فالح غير بس تمنى
طاب فينها الصدفه الموعوده
ياقميص عريان
لو شمه العرقان .. هيفتح
يا عيون بتغمض وتفتح
يا عروسة الليل
الليل خانك
ويدانى فى رنة خلخالك.. 
ياشجرة الروح..
مش طايل منك ولا عوده
عاوز اجرى 
طريقك مسدوده
اوقف .. اتوبيسك يزنقنى
تخنقنى نتيجة ايامى
اعمل معروف
رح اموت ملهوف
يا عزيز على مصر ..الأمر خطير
افتح شولاتك ..
كيل وادينى 
اكبش وادينى 
نجينى من قعر البير
املا دلوك
ادلقنى قصاد الباب 
لوف اللبلاب على جسمى
واللون اتبخر من رسمى
والبت الملضومه ف شعرى نطقت بالحق 
قالت اسمى
إلحقنى إلحق 
طال بيا الحصر
يا عزيز على مصر
نحيط سيادتكم علما انى 
طول عمرى بالق 
بازقنى زق
فى جزمة ليام السوده
اتكحزت من تحت العجله اتكسر فى حيطانها الاوضه
سكاكين كفوف 
من دمى مش من دم خروف
هذا للعلم 
سكاكين وكفوف
مطبوعه على باب الخلق
4 خمسات
مش علشان العين طبعا 
دى عيون الخلق
كلها سؤالات
كلها سؤالات
سؤالات
سؤالات

شعر.. حمدى محمد حسين

Sponsored Links

اشترك فى النشرة البريدية لتحصل على اهم الاخبار بمجرد نشرها

تابعنا على مواقع التواصل الاجتماعى

قد تقرأ أيضا