الارشيف / مقالات

فضفضه .. أنا هتحرش بيكي وإنتي إعملي مش واخده بالك !!!! .. بقلم: رضوى ابراهيم

بالظبط ده اللي بيحصل في معظم المؤسسات من المدير ... المجتمع العربي عموما والمصري خصوصا معظمه ... تاه قبل ما يتربي علي أساس سليم ... وهو بيكبر اتغذي علي أن الراجل يعمل اللي هو عايزه !!!! مفيش حاجه تعيبه... وكمان إتربي  علشان يكون دنجوان لازم يجمع أكبر عدد من البنات اللي يعرفها ... و اللى مايعرفهاش وبس ! لأ ... لازم يأكل حته من التورته ...بوسه ... حضن .... ولو شاطر يأكل التورته كلها وهو و شطارته ... وبكده يكون قمه الرجوله! ولازم يفضل  دون ... قصدي ... دنجوان في كل مكان وخصوصاً لو أصبح مدير أو صاحب عمل ... مش دايما بتسمع صاحب شركه مصاحب السكرتيره بتاعته؟... أو مدير شركه كدا كدا مع موظفه عنده ؟ ... وتلاحظ إنه لازم تكون الموظفه متوسطة الوضع الاجتماعي أو محتاجه الفلوس  اللي بتقبضها ....أو طمعانه في جوازه ...البنت في مجتماعتنا بتتربي علي عدم الثقه بالنفس ... علي أنها هتبور ... ‘إنها لازم تتجوز أي حد وترضى ... تفضلى بقيود ... لحد ما تروحي بيت جوزك ... وبعدها إنتي حره ... البنت في مجتمعنا بتتربي ... أنه لازم الحجاب ... ومبتتسألش علي الصلاه ... غياب الوعي الديني في الأسره بيأثر علي الست والراجل ... وكل واحد بيكبر بمعتقدات غلط ... معظمهم ... بيعمل كل حاجه في الخفى ... المهم يكون منظره قدام الناس كويس ... يجي معظم أصحاب العمل أو المدير ... يرسم علي البنت ... والبنت مبتقصرش ... تلاقيها لابسه لبس غريب ... بتتدلع علشان تحافظ علي وظيفتها ... وغالبا بيكون الراجل متجوز ... كل واحد فيهم بيكون ليه مطمعه ... هو عايز جسمها ... وهي عايزه تتجوز ... هو يبتدي الضغط ... والمحاصره ... ولو رفضت يبتدي يقرفها في شغلها ... وممكن يكون مركز معاها هي بالذات ... يتلكك لها ... علشان ينول غرضه ... تبتدي سقف طموحاتها ينزل كام درجه ... وترضي إنها تكون صديقته في الضلمه ...علشان تاخد امتيازات ... وظيفتها ... مرتبها يزيد... هدايا ... الخ ... الخ.... وتتحول لفتاة ليل بس مخصوص مش نقل عام ... هي مبتكونش راضيه من جواها ... بس بتحاول تقنع نفسها إنها ضحيه ... ضحية الظروف الاجتماعيه ... الماديه ... الحظ ... الكوسه ... الواسطة ....
ايه حيلك حيلك ... كل دي مبررات إنك تشتغلي فتاه ليل؟ بس أنا مش فتاه ليل ... دي غلطه ... ياسلام ولما تبيعي نفسك بمقابل  يبقي ايه؟ .... تروحي تلومي علي المجتمع ...
يعني مكنش ينفع تسيبي الشغل زي كتير قبلك عملوا كدا لما شافوا ان المساومه علي جسمهم وربنا عوضهم؟!
طيب وأنت يا سيادة الببزنس مان أو يا حضرة المدير المحترم شكلك بيكون إيه وإنت راجل منافق ... بتدخل علي مراتك يا حبيبي يا قلبي ياعقلي وانت بتهين فيها مع ناس أقل منها ؟!
طيب إنت شايف نفسك راجل محترم؟! مره وإنت بتبتدي ترمي شباكك علي الفريسه ... ومره وإنت بتخدع مراتك ... ومره وأنت بتغضب ربنا؟!
نماذج بتحصل في مجتمعنا كل يوم !
حياه ظاهرها محترم وباطنها خفايا مخيفه!
ساعات بنادي بحاجات كتير حلوه ... وإحنا في حياتنا خطايا كتير ... لمجرد منظرنا قدام الناس!
إحترم بيتك علشان بيتك يستحق إنك تحافظ عليه !
إحترم مراتك علشان هي شايله إسمك وداين تدان !
إحترم أولادك لأنهم لو عرفوا سلوكك ... عمرهم ماهيثقوا فيك ... لأن ببساطه إنت بتقولهم حاجات ... وبتعمل عكسها !
و إنتى متخافيش لو سيبتي الشغل إنك متلاقيش غيره ... ربنا موجود ... وعمره ما هيتخلي عنك
ثقي في نفسك وإعرفي إنك مش رخيصه!
لو متثبتيش في شغلك علشان مهاراتك ...أوعي تكوني فاكره إنك هتتثبتي علشان منحناياتك!
أهالينا ربونا بشكل صحيح من صغرنا علشان نطلع ناس أسوياء ....
لو اتحرش بيكي ... حافظي علي نفسك علشان اللي بتهون عليه نفسه ... بيهون علي أي حد ..

Sponsored Links

اشترك فى النشرة البريدية لتحصل على اهم الاخبار بمجرد نشرها

تابعنا على مواقع التواصل الاجتماعى

قد تقرأ أيضا